കവിത ചൊല്ലിയ കഥകൾ

തേടി പോയത് എന്നോ അകന്നുപോയ അക്ഷരങ്ങളെയാണ്.

എന്നാൽ കാത്തിരുന്നത് കഥയും!

കൂടെ പോന്നത് കവിതയും!

നെഞ്ചോട് ചേർക്കാൻ അവൾക്ക് ഒരുപാട് വരികളുണ്ട്. ആരോടും പറയാത്ത ചില സ്വാകാര്യങ്ങൾ ഒളിപ്പിച്ചവരികൾ.

കാറ്റിനെ സ്നേഹിച്ച പച്ചിലയുടെ കഥ അവളൊരു തേങ്ങലോടെ എന്നോട് പറഞു കാറ്റ് വന്ന് വിളിച്ചപ്പോൾ കൂടെപ്പോയത് പറക്കാനുള്ള മോഹം കൊണ്ടാണ്

ഒടുവിൽ വഴിയിൽ എന്നന്നേക്കുമായി

ഉപേക്ഷിക്കപ്പെട്ടപ്പോഴാണു തന്നെ സംരക്ഷിച്ചിരുന്ന മരത്തിന്റെ വിലയറിഞത്.

വെളുക്കുവോളം അവളെന്നോട് കഥപറഞ്ഞിരുന്നു

കാറ്റിന്റെ കഥ, കരിയിലയുടെ കഥ, മണ്ണാം കട്ടയും കരിയിലയും ആ യാത്രപോയ കഥ,

കാക്കയെ പറ്റിച്ച കുയിലിന്റെ കഥ 

പിന്നെ…. പിന്നെ…

അക്ഷരങ്ങളെ ചതിച്ച തൂലികയുടെ കഥ. അത്  പറഞപ്പോൾ അവളുടെ കണ്ണുകൾ ജ്വലിച്ചു.

ഇടക്കെപ്പോഴോ ഞാൻ ഉറങ്ങി…

അവളും

കഴിഞതെല്ലാം കഥകൾ 

വരാനുള്ളതെല്ലാം പ്രതീക്ഷകൾ…

ഞങ്ങളുറങ്ങട്ടെ ഉണരാൻ വേണ്ടി.

ഇര ഒരു സമ്പൂർണ്ണ സസ്പെൻസ് ത്രില്ലെർ

ഇര ഒരു സമ്പൂർണ്ണ സസ്പെൻസ് ത്രില്ലെർ എന്ന് വിശേഷിപ്പിക്കാവുന്ന ഒരു മനോഹര ചിത്രം. ഉണ്ണിമുകുന്ദൻ എന്ന നടനെ ഇത്രയും നന്നായി ഉപയോഗിച്ച സിനിമ സമീപകാലത്തുണ്ടായിട്ടില്ല. സത്യത്തിൽ ഇര ക്കൊപ്പം സഞ്ചരിച്ച ഓരോ നിമിഷവും ആ നടനോടുള്ള ഇഷ്ടം കൂടിയതെ ഉള്ളു അത്ര കയ്യടക്കത്തോടെയാണ് തൻറെ കഥാപാത്രത്തെ അദ്ദേഹം സമീപിച്ചിരിക്കുന്നതും അഭിനയിച്ചു ഫലിപ്പിച്ചിരിക്കുന്നതും.
ഡോക്ടർ ആര്യൻ എന്ന കഥാപത്രമായി സുരേഷ് ഗോപിയുടെ മകൻ ഗോകുൽ വേഷമിടുന്നു ഗോകുലിന്റെ അഭിനയവും അഭിനന്ദനാർഹമായ നിലയിൽ മെച്ചപ്പെട്ടിരിക്കുന്നു എന്നത് ഈ ചിത്രത്തിലൂടെ അനുഭവിച്ചറിയാം.
എല്ലാത്തിലും ഉപരി സൈജു എന്ന സംവിധായകന്റെ ഒരു ഗംഭീരക്രാഫ്റ്റുകൂടിയാണ് ഇര. മലയാള സിനിമയിലെ അതികായൻമാർ എന്ന് വിശേഷിപ്പിക്കാവുന്ന ഉദയ കൃഷ്ണയും വൈശാഖുമാണ് നിർമ്മാണം.
ചിത്രത്തിലെ ഗാനങ്ങളും തരക്കേടില്ലാത്തവയാണ്.
അടുത്തതാകാലത്ത് സിനിമാ മേഖലയിൽ ഉണ്ടായ ചില സംഭവങ്ങളും. ആദിവാസി മേഖലയിലെ ചില പ്രശ്നങ്ങളുമെല്ലാം സിനിമയിൽ പറഞ്ഞുപോകുന്നുണ്ട്. അൽപ്പസ്വൽപ്പം ക്ളീഷേ മുഹുർത്തങ്ങൾ ഉണ്ടെങ്കിലും പ്രേഷകരുടെ ആസ്വാദനത്തെ ബാധിക്കാത്തവിധം അവ കൈകാര്യം ചെയ്തിട്ടുണ്ട്. അൽപ്പം പ്രണയത്തിലൂടെയും പ്രതികാരത്തിലൂടെയും കടന്നുപോകുന്ന ചിത്രം സാമൂഹ്യ പ്രശ്നങ്ങളിലേക്കുള്ള ഒരു ചൂണ്ടുവിരലാകാനുള്ള ശ്രമം കൂടിയാണ്. താരമൂല്യങ്ങളെ വകവെയ്ക്കാതെ അമിത പ്രതീക്ഷയൊന്നുമില്ലാതെ ഇര എന്ന സിനിമ കാണാം

Ira Malayalam Movie Review By Devan Thodupuzha | Unni Mukundan, Gokul Suresh, Miya George
www.facebook.com/devanofficial

പൂമരം എന്ന പാഴ്ത്തടിയെപറ്റി രണ്ട് വാക്ക് |പൂമരം റിവ്യൂ

സംവിധായകൻ എബ്രിഡ് ഷൈൻ, 1983 എന്ന ആദ്യചിത്രത്തിൽ കൂടിതന്നെ പ്രേക്ഷക ഹൃദയം കീഴടക്കി ആക്ഷൻഹീറോ ബിജുവിലൂടെ പ്രേക്ഷകമനസ്സുകളിലെ തൻറെ സ്ഥാനം ഊട്ടി ഉറപ്പിച്ചു. പിന്നീടിപ്പോൾ മൂന്നാം ചിത്രമായ പൂമരം, ഒരു വർഷത്തിലേറെയായി പ്രേക്ഷകർ കാത്തിരുന്ന ചിത്രം. ആദ്യ രണ്ടു ചിത്രങ്ങളെ വിലയിരുത്തി മലയാളി പ്രേക്ഷകർ ഏറെ പ്രതീക്ഷ കൊടുക്കുമെന്ന് ഉറപ്പുള്ള ചിത്രം മറ്റുള്ളതിനേക്കാളൊക്കെ മികച്ച കലാസൃഷ്ടി ആയിരിക്കണം മൂന്നാം ചിത്രമെന്നിരിക്കെ പൂമരം പേരിനെ അർത്ഥവത്താക്കും വിധം ഒരു പാഴ്ത്തടിയായി മാറി. പൂമരത്തിന്റെ തടികൾ മറ്റൊന്നിനും ഉപയോഗിക്കാറില്ല!!!
എന്ത് പുതിയ പരീക്ഷണമാണെങ്കിലും സിനിമാ എന്ന കല പിന്തുടരുന്ന ചില ചിട്ടവട്ടങ്ങളെ പാടെ മറന്നു കുറെയേറെ വിഷ്വൽസ് കൂട്ടി സംയോജിപ്പിച്ചാൽ അതിനെ എങ്ങനെ സിനിമയെന്ന് വിളിക്കും. മനോഹരമായ ഒരുപാടു കവിതകൾ ആവശ്യത്തിനും അനാവശ്യത്തിനും ഇതിനിടയിൽ തിരുകികയറ്റിയത് അത്രകണ്ട് മേന്മയായി എന്നുതോന്നുന്നില്ല. കവിതകൾ എല്ലാം നന്നായിരിക്കുന്നു അതിന്റെ സൃഷ്ട്ടാക്കൾ അഭിനന്ദനം അർഹിക്കുന്നു.
പ്രേക്ഷകരെ പിടിച്ചിരുത്താൻ തക്കതായ ഒന്നുമില്ലാതെ ഇങ്ങനൊരു ചിത്രം അവസാന പ്രിവ്യൂ കണ്ടതിനു ശേഷവും പുറത്തിറക്കാൻ തീരുമാനിച്ച സംവിധായക മനസ്സോ അതിലെ വാണിജ്യ താല്പര്യത്തെപോലുമോ മനസിലാകുന്നില്ല ഒരു പക്ഷെ ഒരു വർഷക്കാലമായി ചിത്രത്തിന് ഉണ്ടായ ഹൈപ്പ് ചിത്രത്തെ രക്ഷിക്കും എന്ന മുൻ വിധിയോ അതോ എന്ത് ചവറും മലയാളികൾ സ്വീകരിക്കും എന്ന ധാഷ്ട്യമോ എന്ത് തന്നെ ആയാലും സാധാ പ്രേക്ഷകന്റെ മനോനിലയിൽ പൂമരം ഒരു പക്കാ ചവർ തന്നെ. കണ്ടിറങ്ങുമ്പോൾ ഇതെന്തു മൈ**** സിനിമ ആടാവേ!! എന്ന് രോഷം കൊള്ളാൻ അവനെ ചൊടിപ്പിക്കുന്ന സിനിമ അതാണ് യാഥാർഥ്യം. ഇനി മറ്റൊന്ന് ബുദ്ധിജീവികൾ എന്ന വർഗം മനസുകൊണ്ട് ഇഷ്ട്ടപെട്ടില്ലെങ്കിലും ഒരുകുന്തവും മനസിലായില്ലെങ്കിലും വാനോളം പുകഴ്ത്തും വെറുതെയാണ് . ചിലർ നല്ലതെങ്കിലും താഴ്ത്തികെട്ടും അങ്ങനെയും ഉണ്ട് ബുദ്ധിജീവികൾ. എന്തായാലും ഞാൻ എന്റെ അഭിപ്രായം പറഞ്ഞു മുകളിൽ പറഞ്ഞ ഏതു വിഭാഗത്തിലും എന്നെ പെടുത്താം. പക്ഷെ നിഷ്പക്ഷം എന്നൊന്നുണ്ട് അതാണെന്റെ പക്ഷം . എനിക്ക് പൂമരത്തിലെ കവിതകളും പിന്നെ സെന്റ് തെരേസാ കോളേജിലെ ആ പെങ്കൊച്ചിന്റെ അഭിനയവും പോലീസ് സ്റ്റേഷനിലെ ഏതാനും ഡയലോഗുകളും ഒഴികെ ബാക്കി എല്ലാം അതീവ വിരസത സമ്മാനിച്ച കാഴ്ച്ചകളായിരുന്നു .പൂമരം എന്ന സിനിമയിൽ കഥയോ കഥാപത്രങ്ങളോ ഇല്ല കണ്ടിരിക്കാൻ ഒരു കുന്തവും ഇല്ല. പുതിയ പരീക്ഷണമെന്നും സിനിമ ഒരു പാടുപേരുടെ വിയർപ്പാണെന്നും ഒക്കെ പൂമരത്തിനു സ്തുതിപാടുന്ന പാണന്മ്മാർ സദയം ക്ഷമിക്കുക.
ഞാനും ഒരു സിനിമാ മോഹിയാണു സിനിമ ഒരു പാട്പേരുടെ വിയർപ്പുമാണ്. എന്നാൽ ഈ വിയർപ്പിന്റെ ഫലം അനുഭവിക്കുന്ന പ്രേക്ഷകർ എന്നൊരു വിഭാഗമുണ്ട്. അവരുടെവിയർപ്പിനും വിലയുണ്ട് എന്ന് മനസ്സിലാക്കാൻ കഴിയുന്നവരായിരിക്കണം ഒരു സിനിമയുടെ അണിയറക്കാർ. സിനിമ എന്നത് ഒരു കല എന്നതിലുപരി ഒരു ബിസിനസ് കൂടിയാണ് എന്ന ബോധ്യത്തിൽ ബിസിനസിനെ വിജയിപ്പിക്കുന്ന ഞങ്ങൾ പ്രേക്ഷകരെ കൂടി പരിഗണിക്കുന്ന നല്ലൊരു ചിത്രവുമായി എബ്രിഡ് ഷൈൻ തിരിച്ചുവരുമെന്ന വിശ്വാസത്തിൽ നിർത്തട്ടെ .നല്ലരീതിയിൽ നിങ്ങളെ മടുപ്പിക്കുന്ന ഈ ചിത്രം കാണുന്നതും കാണാതിരിക്കുന്നതും ഇനി നിങ്ങളുടെ തീരുമാനമാണ്‌ . നന്ദി

സുഖമാണോ ദാവീദേ

sukhamano-daveede-film-reviewഅവകാശ വാദങ്ങൾ ഒന്നുംതന്നെ ഇല്ലാതെ ഈ വാരം തീയറ്ററുകളിൽ ഒരു കൊച്ചു സിനിമ പ്രദർശനത്തിനെത്തി സുഖമാണോ ദാവീദേ. വലിയ താരനിരകൾ ചിത്രത്തിൽ ഇല്ല. വളരെ സുധാര്യമായ നൈസർഗിക അഭിനയമാണ് ഭഗത് മനുവലിൻറെത് . ഇതുപോലുള്ള നിഷ്ക്കളങ്ക ചിത്രങ്ങൾക്ക് ആ രീതി ഒരു പാട് ഗുണമുണ്ടാക്കുമെന്നാണ് തോന്നുന്നത്. ഭഗത്ത് പണ്ടെ കഴിവുതെളിയിച്ച നടനാണ് അദ്ദേഹത്തെപ്പറ്റി കൂടുതൽ പറയേണ്ടകാര്യമില്ല. നവാഗതരായ ഇരട്ട സംവിധായകർ അനൂപ് ചന്ദ്രനും രാജ മോഹനനും ആദ്യ ചിത്രം കയ്യടക്കത്തോടെ ചെയ്തു എന്നത് അഭിനന്ദാർഹമാണ്
ഒരു കുടുംബത്തിലെ രണ്ടു സഹോദരങ്ങൾ തമ്മിലുള്ള ആത്മബന്ധവും അതിനിടയിൽ കടന്നുകൂടുന്ന പ്രശ്നങ്ങളുമാണ് ചിത്രത്തിന്റെ കഥാതന്തു. ചേട്ടൻ ദാവീദായി ഭഗത് മാനുവലും അനിയൻ ജോയലായി മാസ്റ്റർ ചേതൻ ലാലും നല്ല പ്രകടനം തന്നെ കാഴ്ച്ചവെച്ചിട്ടുണ്ട്.ശലോമിയായി പ്രിയങ്ക നായർ, ടെസയായി ശ്രുതി ബാല, സുധീർ കരമന, ബിജുക്കുട്ടൻ, നന്ദു ലാൽ, നോബി, നിർമ്മൽ പാലാഴി, വിജിലേഷ്, അരുണ്‍ പോൾ, യോഗി റാം, താര കല്യാണ്‍, ആര്യ, മഞ്ജു സതീഷ്, സീതാ ലക്ഷ്മി എന്നിവരും ചിത്രത്തിൽ പ്രധാന വേഷങ്ങൾ കൈകാര്യം ചെയ്യുന്നു. കൈതപ്രം, മോഹൻ സിത്താരകൂട്ടുകെട്ടിൽ പിറന്ന ചിത്രത്തിലെ ഗാനങ്ങൾ ഒരുപാടിഷ്ട്ടപെട്ടു അതുപോലെ ടൈറ്റിൽ വര്ക്കുകൾ ഗംഭീരം. തൊടുപുഴയുടെ ദൃശ്യഭംഗി ഒരു പിടി നല്ലചിത്രങ്ങളിലൂടെ വെളളിത്തിരയിൽ ഇങ്ങനെ കാണുന്നത് ഏറെ അഭിമാനം തോന്നുന്ന ഒന്നാണ്. sukhamano-daveede-film-review- devan mv thodupuzhaസമീപകാല റീലിസ് ചിത്രങ്ങൾ സമ്മാനിച്ച നിരാശകളിൽ നിന്നും എന്നിലെ സിനിമാ ആസ്വാദകനെ ത്രിപ്തിപെടുത്തയ ചിത്രമെന്ന നിലയിൽ ഒരു ചെറിയ സിനിമ എന്ന ധാരണ മുന്നിൽ നിർത്തി കണ്ടാൽ സുഖമാണോ ദാവീദേ നിങ്ങൾക്കും ഇഷ്ടപെടും തീർച്ച .

പാതിമുറിഞ ടിക്കറ്റുകൾ

പാതിമുറിഞ ടിക്കറ്റുകൾഒരു സിനിമ അത് കണ്ടുതീർത്ത് മടങ്ങുമ്പോൾ ബാക്കിയാകുന്നത് പാതികീറിയടിക്കറ്റും മനസ്സിൽ ഉടക്കിയ ചുരുക്കം കഥാപാത്രങ്ങളുമാണ്. തിരക്കഥാകൃത്ത് ഭാവിയും ഭൂതവും വിവരിക്കാതെ വർത്തമാനകാലത്തിൽ കഥ യിൽ തെല്ലൊന്ന് പരാമർശിച്ചുകടന്നുപോയ ചിലപേരുകളെ ചിട്ടയോടെ കഥാപാത്രമായി രൂപ പെടുത്തുകയാണു മൃദുൽ തന്റെ പാതിമുറിഞ ടിക്കറ്റുകൾ എന്ന പുസ്തകത്തിലൂടെ.
രാഘവന്റെ തിരോധാനവും, ബിരിയാണിയും സുലൈമാനിയും പിന്നെ ഒരുപാട് മൊഹബത്തും ഒക്കെ പറയാതെ പറഞ കഥ കളാകുമ്പോൾ അതിലെ കഥാപാത്രങ്ങൾക്ക് മനസ്സിൽ ജീവൻ നൽകുമ്പോൾ, വെള്ളിത്തിരയിലെ കാഴ്ച്ചക്കപ്പുറം ഏതൊരു സിനിമാ പ്രേമിക്കും വായനക്കാരനും ആസ്വാദനത്തിന്റെ മറ്റൊരു തലംകൂടി തുറന്നിടുന്നു രചയിതാവ്.
വായിച്ചറിയേണ്ട അനുഭൂതിതന്നെയാണ് ഫിക്ഷൻ കഥകളുടെ സമാഹാരമായ പാതിമുറിഞടിക്കറ്റുകൾ

ആദി ഒരു താരോദയമോ…?

ഒരു നിരൂപകന്റെ കാഴ്ച്ചപാടുകളിലൂടെ ആദി എന്നചിത്രത്തെ സമീപിക്കുമ്പോൾ എനിക്കെന്നല്ല ഏതൊരു ചലചിത്ര നിരൂപകനും ഒന്ന് ഉറപ്പിക്കാം പ്രണവ് മോഹൻലാൽ അല്ലെങ്കിൽ സിനിമാപ്രവർത്തകരുടെ പ്രിയപെട്ട അപ്പു മലയാള സിനിമയിൽ  ഭദ്രമായി തന്റെ അടിത്തറ പാകികഴിഞു.

നായകനായി വേഷമിടുന്ന ആദ്യ ചിത്രത്തിൽ തന്നെ മലയാളത്തിലെ ചരിത്രം മാറ്റിയെഴുതിയ അണിയറ ശിൽപ്പികൾക്കൊപ്പം പ്രവർത്തിക്കാൻ കഴിഞു എന്നത് താരപുത്രൻ എന്ന പദവിയുടെ പുണ്യമാവാം. ലളിതമായ ശാന്തമായ ആദി എന്ന കഥാപാത്രത്തെ അതിലേറെ ലളിതമായി തന്മയത്വത്തോടെ പ്രേക്ഷകമനസ്സുകളിൽ എത്തിക്കാൻ സാധിച്ചത് അപ്പു   എന്ന കലാകാരന്റെ അഭിനയ മികവ് തന്നെ.

ജീത്തു ജോസഫ് എന്ന സംവിധയകന്റെ കയ്യൊപ്പിനുമേൽ ഞാൻ മറ്റൊന്നും പറയേണ്ടതില്ലല്ലോ ആദി എനിക്ക് ഒരുപാടിഷ്ട്ടപെട്ടു നല്ലൊരു കുടുബ ചിത്രം

സ്ട്രീറ്റ് ലൈറ്റ്സ് റിവ്യൂ

Street Lights Review #സ്ട്രീറ്റ് ലൈറ്റ്സ്

അത്രയതികം പ്രമോഷനുകൾ ഇല്ലാതെയാണ് മമ്മൂക്കയുടെ പ്ലെ ഹൗസ് നിർമ്മിച്ച്  ഇക്കതന്നെ ജെയിംസ് എന്ന പോലീസ് ഉദ്യോസ്ഥനായി വേഷമിടുന്ന  സ്ട്രീറ്റ് ലൈറ്റ്സ് പ്രദർശനത്തിനെത്തിയത്. കാണേണ്ടവർ കണ്ടാമതി എന്ന അണിയറപ്രവർത്തകരുടെ മനോഭാവം ചിത്രത്തെ പറ്റിയുള്ള അമിത പ്രതീക്ഷകളിൽനിന്നും എന്നെ വിലക്കി. അതുകൊണ്ട് തന്നെ ചിത്രം നിരാശപെടുത്തിയില്ല.

കോമഡി സസ്പെൻസ് ത്രില്ലറായ സ്ട്രീറ്റ് ലൈറ്റ്സ് കമലഹാസന്റെ ഉത്തമവില്ലൻ, വിശ്വരൂപം എന്നീ ചിത്രങ്ങൾക്ക് ക്യാമറ ചലിപ്പിച്ച ശ്യാംദത്ത് ആദ്യമായി സംവിധാനം ചെയ്യുന്നചിത്രമാണ്.

ആവശ്യത്തിനുമാത്രം മാസ് കോമഡി എല്ലാം ഉൾപെട്ടചിത്രം ഒറ്റ ദിവസം സംഭവിക്കുന്ന കാര്യങ്ങളാണു തിരശീലയിൽ എത്തിക്കുന്നത്. കഥയും കഥ നടക്കുന്ന സാഹചര്യങ്ങളും ഒരു ക്ലീഷേ എന്ന് പറയാമെങ്കിലും പ്രേക്ഷകനെ ബോറടിപ്പിക്കാത്ത വിധം ചിത്രീകരിക്കാൻ ശ്യാംദത്ത് ശ്രമിച്ചിരിക്കുന്നു.

ഈ ചിത്രത്തിലും ഇക്കയുടെ സൗന്ദര്യം ഒരു പടികൂടി വർദ്ധിച്ചു എന്നത് സ്വാഭാവികം. ധർമ്മജനും ഹരീഷ് കണാരനും തങ്ങളുടെ റോൾ വ്രിത്തിയായിചെയ്തു. എന്നാൽ ഇവരുടെ കഥയുമായി നേരിട്ട് ബന്ധമില്ലാതെ മറ്റൊരുതലത്തിൽ സൗബിൻ ലിജോമോൾ പ്രണയവും ചിത്രത്തിന്റെ ഭാഗമാകുന്നു.

ചുരുക്കിപറഞാൽ സ്ട്രീറ്റ് ലൈറ്റ്സ് അത്രവലിയ അവകാശവാദങ്ങളൊന്നുമില്ലാതെ സാധാരണ പ്രേക്ഷകനെ ത്രിപ്തിപെടുത്തുന്ന ഒരു കൊച്ചു മെഗാസ്റ്റാർ ചിത്രം അത്രതന്നെ

#സ്ട്രീറ്റ്_ലൈറ്റ്സ് #devan

എനിക്ക് ഏറ്റവും പ്രിയപെട്ടവരെ,

ഓൺലൈൻ എഴുത്ത് ലോകത്തേക്ക് ഞാൻ കടന്നുവന്നിട്ട് പത്തുവർഷത്തിലേറെ ആയിരിക്കുന്നു. ഈ വലിയൊരു കാലയളവിൽ പോലും എഴുത്തിൽ എന്റേതായ ഒരു വ്യക്തിമുദ്ര പതിപ്പിക്കാൻ എനിക്കായിട്ടില്ല എന്നിരുന്നാലും ഓൺലൈൻ എഴുത്തിന്റെ ഒരു സുവർണ്ണകാലഘട്ടത്തിൽ കുറെയേറെ സൗഹൃദങ്ങൾ സമ്പാദിക്കാൻ കഴിഞ്ഞതിൽ അതിയായ സന്തോഷമുണ്ട്. അക്ഷരങ്ങൾക്കൊപ്പമുള്ള പ്രയാണത്തെ അർത്ഥവത്താക്കിയതും ആ സൗഹൃദങ്ങൾ തന്നെയാണ് ബ്ലോഗെഴുത്തിന്റെ പ്രതാപം മങ്ങിയെങ്കിലും എഴുത്തിടങ്ങളിലെ സ്നേഹബദ്ധങ്ങളുടെ കെട്ടുറപ്പിനെ ഒരിക്കലും ഒരു ബ്ലോഗർക്കും മറക്കാനാകില്ല. അക്കാലഘട്ടത്തിലെ മിക്ക ബ്ലോഗുകളും ഇന്ന് നിർജീവമാണ് മറ്റൊന്നിനോടും മാറ്റുരക്കാനാകാത്ത സർഗ്ഗസൃഷ്ട്ടികൾ ഒരു ശ്മശാനത്തിലെന്നപോലെ ഇന്നും ആ ബ്ലോഗുകളിൽ ഉറങ്ങി കിടക്കുന്നു. അങ്ങനെ അകാലത്തിൽ സ്‌മൃതിയടഞ്ഞ ബ്ലോഗുകളെ കുത്തിപൊക്കികൊണ്ട് പഴയ ഓൺലെൻ എഴുത്തുകളെ നിങ്ങൾക്ക് മുന്നിലേക്കു ഒരിക്കൽക്കൂടി എത്തിക്കാൻ ശ്രമിക്കുകയാണ് ഞാൻ
കാണാമറയത്തെ എഴുത്തുകളെ അന്യോഷിച്ചുള്ള ഈ യാത്രയിൽ കൂടെ നിന്ന് പ്രോത്സാഹിപ്പിക്കണം എന്നുപറഞ്ഞുകൊണ്ട് തൽക്കാലം വിട…
സ്നേഹപൂർവ്വം ദേവൻ

വിമാനം

vimanamപൃഥ്വിരാജിൻറെ വിമാനത്തോടൊപ്പം പയർന്നുയര്ന്നപ്പോൾ കിട്ടിയത് ഈ വർഷത്തെ ഒരു മനോഹര ചിത്രം ആസ്വദിക്കാൻ പറ്റിയ സന്തോഷം തന്നെ. എന്റെ നാട്ടുകാരൻ കൂടിയായ സജി എം തോമസ്എന്ന വ്യക്തിയുടെ ജീവിതകഥ യാണ് വിമാനം എന്ന സിനിമയായി നവാഗതനായ പ്രദീപ് നായര്‍ അണിയിച്ചൊരുക്കിയത്. മൊയ്തീന് ശേഷം പൃഥ്വിയുടെ സുന്ദരമായ ഒരു പ്രണയചിത്രം. ഒരേ ഇതിവൃത്തമായതിനാൽ എബി എന്ന സിനിമപോലെ തന്നെ ആകുമോ എന്ന് തോന്നിയിരുന്നു എന്നാൽ എബിയിൽ നിന്നും ഒരുപാട് വ്യത്യസ്തത കൊണ്ടുവരാൻ പ്രദീപ് എന്ന സംവിധായകന് കഴിഞ്ഞു. പ്രേക്ഷകമനം നിറയ്ക്കുന്ന ഒരുതരം കാവ്യപ്രണയവും മനോഹരമായ സംഗീതവും എല്ലാം വിമാനത്തിനെ ഒരു മികച്ച ദൃശ്യ വിരുന്നാക്കിമാറ്റുന്നു സിനിമ കണ്ടിറങ്ങുമ്പോഴും ജാനകിയും വെങ്കിടിയും പ്രേക്ഷക മനസ്സിൽ ഒരു വിമാനത്തിലെന്ന പോലെ പറന്ന് നടക്കും എന്നുറപ്പ്. ഈ സിനിമ കാണാം ധൈര്യപൂർവ്വം.

മാസ്റ്റർപീസ്

റിലീസിന് മുൻപ് നമ്മുടെ പ്രിയപ്പെട്ട സന്തോഷ് പണ്ഡിറ്റ് പുള്ളിക്കാരന്റെ പേജിൽ പറഞ്ഞു ഓഖി കൊടുങ്കാറ്റിനേക്കാൾ വേഗത്തിൽ മാസ്റ്റർപീസ് തരംഗം കേരളത്തിൽ ആഞ്ഞടിക്കുമെന്ന്, ഒരർത്ഥത്തിൽ പണ്ഡിറ്റ് ജി പറഞ്ഞത് തന്നെ സംഭവിച്ചെന്നുപറയാം. ഓഖി കൊടുങ്കാറ്റിനേക്കാൾ വലിയ ദുരന്തമാണ് മാസ്റ്റർപീസ്. ആദ്യനാളുകളിൽ ഫാൻസിന്റെ ഉന്തുവണ്ടികൾ മാസ്റ്റർപീസിനേം പൊക്കി സോഷ്യൽ മീഡിയയിൽ തലങ്ങും വിലങ്ങും ഓടി (തള്ളെന്ന് പറഞ്ഞാൽ ഒടുക്കത്തെ തള്ളൽ അല്ലാരുന്നോ) ഇതുകണ്ട് പടം കാണാൻ ചെന്ന പ്രേക്ഷകരെ ക്രിസ്മസ് നാളുകളിൽ തന്നെ ഏപ്രിൽ ഫൂളാക്കി വിട്ടു എന്ന പുതിയ ചരിത്രം മാസ്റ്റർപീസിനു സ്വന്തം. ഇതിനു മുൻപ് പല മമ്മൂട്ടി ചിത്രങ്ങളും ആദ്യനാളുകളിൽ തള്ളൽ റിവ്യൂ കണ്ട് തിയ്യറ്ററിൽ കയറി ഇളിഭ്യനായി മടങ്ങേണ്ടിവന്ന ഒരു സിനിമാസ്വാദകൻ എന്ന നിലയിൽ ഇത്തവണ ഹൈലെവൽ വിട്ട് ലോ ലെവൽ പ്രതീക്ഷയിലാണ് സിനിമ കാണാൻ കയറിയിരുന്നത് ഇത് മലമറിക്കാനൊന്നും പോണില്ല എന്നറിഞ്ഞുകൊണ്ട് തന്നെ, ആദ്യമായെന്റെ പ്രതീക്ഷകൾ തെറ്റിക്കാത്ത ഒരു മമ്മൂട്ടി ചിത്രം എന്ന ബഹുമതി മാസ്റ്റർപീസിനിരിക്കട്ടെ. ക്യാമ്പസ് ചിത്രം എന്ന മേലങ്കിയിൽ തീയറ്ററിൽ എത്തിയ മാസ്റ്റർപീസ് സത്യത്തിൽ ഒരു ക്രൈം ത്രില്ലർ ആണ്. ഉദയ കൃഷ്‌ണയുടെ തിരക്കഥ പതിവ് ചട്ടക്കൂടിൽ തന്നെ തല്ലിക്കൂട്ടിയിരിക്കുന്നു ഒരുപാട് ക്ലിഷേകൾ കൂട്ടിയിണക്കിയ കഥ. സസ്പെൻസ് അവസാനം വരെ കാത്ത് സൂക്ഷിക്കാൻ സംവിധായകന് ഒരു രീതിയിലും സാധിച്ചില്ല എന്നതാണ് എന്നെ സംബന്ധിച്ചിടത്തോളം വാസ്ഥവം. ആദ്യപകുതി നന്നായി വെറുപ്പിച്ചു മമ്മൂട്ടിയുടെ വരവിനുശേഷവും വല്യ മെച്ചമൊന്നും ഉണ്ടായില്ല. സ്ത്രീപക്ഷ ബഹുമാനം ഇക്കയുടെ ഡയലോഗിലൂടെ നിറഞ്ഞുകവിഞ്ഞൊഴുകിയത് ഒരുപാട് അരോജകമായി തോന്നി. പാഷാണവും തന്നെ കൊണ്ട് കഴിയുന്ന രീതിയിൽ വെറുപ്പിച്ചപ്പോൾ കലാഭവൻ ഷാജോൺ തന്റെ അഭിനയത്തിൽ നിലവാരം പുലർത്തി. പാട്ടുകളെ പറ്റി പ്രിത്യേകം പറയാൻ ഒന്നുമില്ല.പിന്നെ സ്റ്റണ്ട് മ്യാരകം എന്നേ പറയേണ്ടു തമിഴിൽ പോലും ഇത്ര അമാനുഷികത്വം ഉണ്ടാവില്ല. സന്തോഷ് പണ്ഡിറ്റ് എന്തിനോ വേണ്ടി തിളയ്ക്കുന്ന സാംമ്പാർ എന്ന് പറഞ്ഞപോലെ ഒരു ക്യാരക്ടർ! എന്തായാലും വെറുപ്പിച്ചില്ല ആശ്വാസം!!. വരലക്ഷ്മിയെയും പൂനത്തിനെയും ഒക്കെ എന്തിനാണാവോ കൊണ്ടുവന്നേ, പാട്ടിനിടയിൽ വയറുകാണിക്കാനാകും. മാസ്റ്റർ “പീസ്” എന്ന് പറയുമ്പോ അങ്ങനായിരിക്കും അല്ലെ?. എന്തായാലും കടുത്ത താരാരാധന മൂത്ത് കണ്ണ് കാണാതായ ഫാൻസ്‌ അസോസിയേഷൻ പിള്ളേർക്ക് ആശ്വാസം നല്കാൻ വേണ്ടി മാത്രം ഉണ്ടായ ഒരു സൃഷ്ട്ടി എന്ന് വിശേഷിപ്പിച്ചാൽ തെറ്റില്ല.പ്രിയപ്പെട്ട ഫാൻസുകാരെ പ്രേക്ഷകന് അമിത പ്രതീക്ഷ നൽകി സിനിമയെ ഇല്ലായ്‌മ ചെയ്യുന്നത് നിങ്ങളാണ് ഇനിയെങ്കിലും അതൊഴിവാക്കുമല്ലോ. സാധാരണക്കാരനൊന്നും ദഹിക്കാൻ ഉള്ള വിഭങ്ങളോ പുതുമയോ സിനിമയിൽ ഇല്ല. ഉള്ളതെല്ലാം പക്കാ ക്ളീഷേയും. ഞങ്ങളെ പോലുള്ള സാധാരണക്കാർക്കിഷ്ടം പഴയ വല്യേട്ടനെയും, നരസിംഹ മന്നാടിയാരെയും ഒക്കെയാണ് നല്ല ചിത്രങ്ങളിലൂടെ രണ്ടായിരത്തി പതിനെട്ടിൽ എങ്കിലും ഇക്ക പ്രേക്ഷക ഹൃദയം കീഴടക്കട്ടെ.